Newid ymddygiad ffermwyr – ffordd newydd ymlaen - Gweminar

Ymunwch ag AHDB i glywed sut mae pecyn cymorth, a rheoli data ar ffermydd mewn ffordd ragweithiol, wedi arwain at newid persbectif ffermwyr llaeth ar reoli clefydau.  Yn ogystal â newid ymddygiad, cewch glywed sut mae cymorth cynhwysfawr (HerdAdvance) wedi arwain at gynnydd cyffredinol o ran iechyd anifeiliaid a chynhyrchedd ar y ffermydd a gymerodd ran.

"HerdAdvance oedd y cymhelliad oedd ei angen arnaf i fynd i’r afael â materion ar y fferm.  Rhoddodd y cymorth a’r anogaeth yr hyder imi wneud newidiadau"

Ers ei lansio yn 2019, mae HerdAdvance wedi cynorthwyo dros 500 o ffermwyr llaeth yng Nghymru i roi mesurau yn eu lle i wella iechyd a lles anifeiliaid, drwy fabwysiadu technegau rhagataliol wrth gynllunio iechyd y fuches.

Roedd y prosiect peilot yn darparu cymorth un i un i ffermwyr ac yn helpu ffermwyr a milfeddygon i weithio gyda’i gilydd i sicrhau dull cyfunol a holistig o fynd i’r afael â phryderon am iechyd a lles anifeiliaid llaeth, gan wneud defnydd o ddata hefyd i wneud penderfyniadau rheoli gwybodus.

Bydd AHDB, ynghyd ag arbenigwyr y diwydiant a gwerthuswyr HerdAdvance, James Breen a David Rose, yn cyflwyno canfyddiadau’r prosiect HerdAdvance gan ganolbwyntio ar:

• Ddeall sut y cafodd nodau ac amcanion y prosiect eu bodloni
• Newidiadau yn ymddygiad ffermwyr yn sgil cymryd rhan yn y prosiect
• Mesur canlyniadau o ran gwelliannau i iechyd a lles anifeliaid
• Yr effaith y gall yr hyn a ddysgwyd ei gael ar gyfleoedd ariannu yn y dyfodol

Mae HerdAdvance yn rhan o’r Rhaglen Gwella’r Sector Llaeth pum mlynedd, sydd wedi derbyn cyllid drwy Cymunedau Gwledig Llywodraeth Cymru – Rhaglen Datblygu Gwledig 2014-2020, sy’n cael ei hariannu gan Gronfa Amaethyddol Ewrop ar gyfer Datblygu Gwledig a Llywodraeth Cymru.

I gael mwy o wybodaeth am y digwyddiad, e-bostiwch Teaghan Tayler – Uwch Reolwr Cyfnewid Gwybodaeth AHDB Cymru teaghan.tayler@ahdb.org.uk.

Bywgraffiadau Siaradwyr

James Breen BVSc PhD DCHP MRCVS - RCVS Recognised Specialist in Cattle Health & Production

Graddiodd James fel milfeddyg o Brifysgol Bryste yn 1998, ac ar ôl gweithio gydag anifeiliaid anwes ac anifeiliaid fferm fel cynorthwyydd milfeddygol mewn practis yng Ngwlad yr Haf, dychwelodd i Fryste yn 2001 i wneud cyfnod preswyl ym maes Meddyginiaeth Anifeiliaid Fferm.  Yn ddiweddarach, ymunodd â’r Athro Andrew Bradley a’r Athro Martin Green i weithio ar brosiect ymchwil cenedlaethol i fastitis mewn buchod llaeth dan y Cyngor Datblygu Llaeth (MDC), a chymerodd ran yn natblygiad Cynllun Rheoli Mastitis Cenedlaethol AHDB.  Yn dilyn hynny, cwblhaodd gyfnod preswyl tair blynedd gydag Ymddiriedolaeth Coleg Brenhinol y Milfeddygon (RCVS) mewn Cynhyrchu Meddyginiaethau Anifeiliaid, gan rannu ei amser rhwng y practis yng Ngwlad yr Haf, gwaith labordy ymgynghorol i QMMS Ltd ac ymchwil i fastitis.  Ar hyn o bryd mae’n rhannu ei amser rhwng addysgu yn Ysgol Filfeddygol Prifysgol Nottingham a gwaith ymgynghori annibynnol i Map of Ag, gan weithio gyda ffermwyr llaeth a’r gadwyn gyflenwi, yn ogystal â gweithio’n rhan-amser mewn practis llaeth yn Glastonbury.  Mae ganddo dystysgrif RCVS mewn Iechyd a Chynhyrchu Gwartheg (2003) a Diploma RCVS mewn Iechyd a Chynhyrchu Gwartheg (2008) a chafodd PhD am ei astudiaethau i ffactorau risg mastitits clinigol a chyfrif celloedd somatig uwch mewn buchod.  Mae’n Arbenigwr RCVS cydnabyddedig ym maes  Iechyd a Chynhyrchu Gwartheg.

David Rose - Professor of Sustainable Agricultural Systems, Cranfield University

Mae David yn Ddaearyddwr Gwledig ac mae’n arwain y Grŵp Newid mewn Amaethyddiaeth, sydd wedi’i rannu rhwng Cranfield (a ymunodd ym Mai 2022) a Reading am y tro.  Mae’r grŵp yn gweithio ar agweddau o ehangu ffermydd - gan ymgysylltu, gwrando, ac ymateb i farn ffermwyr a rhanddeiliaid eraill ar newidiadau polisi, arloesi, neu dechnoleg.  Mae gennym ddiddordeb yn y ffordd mae newidiadau mewn amaethyddiaeth yn effeithio ar bobl, cynhyrchedd, a’r blaned, gyda ffocws arbennig ar iechyd meddwl, dysgu ffermwyr, llywodraethu, trosglwyddiadau teg, lles anifeiliaid, newid ymddygiad, ac arloesi cyfrifol.